Ministri i Jashtëm i Turqisë, Hakan Fidan tha të shtunën se Hamasi është i gatshëm të heqë dorë nga kontrolli i Gazës.
Megjithatë, sipas tij, kjo do të ndodhte vetëm nëse krijohet më parë një administratë palestineze e besueshme dhe një forcë policore e trajnuar, jo e Hamasit, kushte që ai tha se duhet t’i paraprijnë çdo pritjeje që grupi të çarmatoset.
Në një intervistë në margjinat e Forumit të Dohas, Fidan tha se pa këto hapa fillestarë, të presësh që Hamasi të çarmatoset në fazën e parë të marrëveshjes së armëpushimit nuk është as “realiste dhe as e realizueshme”.
Ai theksoi se forca policore e propozuar do të përjashtonte anëtarët e Hamasit dhe do të mbështetej nga një forcë ndërkombëtare stabilizimi.
Ai shtoi se Uashingtoni po ushtronte presion mbi Izraelin për përpjekjen e Turqisë për t’u bashkuar me forcën.
Fidan paralajmëroi se dështimi i bashkësisë ndërkombëtare për të çuar planin e armëpushimit në fazën e tij të ardhshme do të përbënte një “dështim të madh” për botën dhe për Uashingtonin, duke vënë në dukje se presidenti i SHBA-së, Donald Trump e kishte udhëhequr personalisht këtë përpjekje.
Fidan tha gjithashtu se besonte që Turqia dhe SHBA-të duhet të gjenin një mënyrë për të hequr sanksionet CAATSA të SHBA-së “shumë shpejt”, dhe shtoi se aleatët e NATO-s kishin filluar të punonin për këtë çështje.
Uashingtoni e hoqi Ankaranë nga programi i saj i avancuar i aeroplanëve luftarakë F-35 dhe vendosi sanksionet në vitin 2020 për shkak të blerjes së sistemeve ruse të mbrojtjes ajrore S-400.
Turqia e ka quajtur këtë veprim të padrejtë dhe ka shprehur shpresën se palët mund ta kapërcejnë çështjen gjatë mandatit të dytë të presidentit Donald Trump.
Fidan tha gjithashtu se plani fillestar prej 28 pikash i Uashingtonit për t’i dhënë fund luftës në Ukrainë, i cili u kritikua nga Kievi dhe vendet evropiane, ishte vetëm një “pikënisje” dhe se tani po evoluonte në një format të ri.
Ai tha se besonte se zyrtarët amerikanë ishin “në rrugën e duhur” për sa i përket teknikave të tyre të ndërmjetësimit dhe shtoi se shpresonte që palët nuk do të largoheshin nga tryeza e negociatave.
Fidan përsëriti gjithashtu gatishmërinë e Turqisë për të pritur bisedime të reja paqeje midis palëve ndërluftuese. /FaktX/
Lexo po ashtu
Ushtria gjermane, Bundeswehr, do të ketë nevojë për rreth 50,000 deri në 60,000 trupa shtesë për të përmbushur kërkesat e Lexo më shumë
Në një ceremoni në selinë e Unionit Afrikan, Bill Gates njoftoi se fondacioni i tij do të mbështesë masivisht projektet Lexo më shumë
Gjatë takimit të tyre të parë zyrtar në Zyrën Ovale, kancelari gjerman Friedrich Merz i dhuroi presidentit të SHBA-së, Donald Lexo më shumë
Një lloj i ri i coronavirusit, i përcaktuar si NB.1.8.1 dhe i njohur jozyrtarisht si Nimbus, është zbuluar edhe në Lexo më shumë